Helburuak

Gure aurrekoek apustu sendoa egin zuten. Hasieratik, Zangozaldean euskara eta euskal kulturarentzako arnasgune bat sortzeko ardura hartu zuten beren gain, periferiako kide izateak zekarren aparteko konpromisoaz jabeturik. Haiengandik jaso dugun herentzia ederrari eustea dagokigu, eta, ahal den neurrian, berau hobetzea atzetik datozenentzat, eta horretan ari gara. Ikastola proiektuaren oinarri nagusiak lantzen jarraitzen dugu, gizarte-kohesioa bilatuz, berdintasunetik, ekitatetik, partaidetzatik, berrikuntzatik eta lankidetzatik abiatuta. Zangozako Ikastolak duela hamarkada batzuk eskualdeko ateak ireki zizkion euskarari eta euskal kulturari, eta euskararen, gure hizkuntzaren, ezagutza eta erabilera indartzen jarraitu nahi dugu Zangozaldean.

Nolanahi, gure bideak, gure adinekoenak bezalaxe, baditu oztopoak. Eskualdean azken urteotan jasaten ari garen jaiotza-defizitaren ondorioz, despoluatzearen eta zahartze demografikoaren gaiak mahai gainean daude. Kontu horrek larritu egiten gaitu, eta Zangozako Ikastola eragile sozial eta sozializatzaile aktiboa den heinean, Nafarroa Oinezek eskaintzen digun erakusleihoa baliatu nahi dugu joera horretan eragiteko.

Gauzak honela, hauexek dira erdietsi nahi ditugun helburuak:

• Zangozako Ikastolak interes publikoari erantzuten dion kalitatezko hezkuntza eta euskalduna eskaintzen du. Herritik eta herriarentzat sortutako ekimena, eskualdea ardatz hartzen duena, baina 100 ikastola baino gehiago biltzen dituen nazio mailako proiektu batean txertatua. Ildo beretik lan egiten jarraitu nahi dugu, indarrean jarraitzen duten jatorrizko helburuei leial, Nafarroan euskararen normalizazioa lortzeko asko baitago oraindik egiteko.
   
• Auzolana. Gure seme-alabei, eskualdeko, Nafarroako eta Euskal Herriko bizilagunei auzolanaren balioa erakusten jarraitu nahi diegu, elkartasuna, hezkuntza eremua gainditu eta gizarte esparrura iristen den proiektu baten inguruko talde-lana. Gure hizkuntza eta kultura zaindu nahi ditugu, gure eskualdea hobetuz eta gure lurra defendatuz.
   
• Finantzazioa. Zangozako Ikastolak finantzazioa behar du lanean jarraitu ahal izateko. Egun kooperatiba osatzen duten familiek 2005ean Haur Hezkuntzako eraikina sortzearekin eragindako zorra jasaten dute, jaiotza-tasa baxuak dakarren zailtasun erantsiarekin; izan ere, familia gutxiagori dagokie ahalegin handiagoa egitea.
   
• Eraginkortasun energetikoa. Egun, aldaketa klimatikoa guztion ahotan dago, eta argi dago abiadura bizian gertatzen ari dela, batez ere giza ekintzagatik. Gauzak horrela, Zangozako Ikastolak erantzukizun-ariketa bat egin nahi du eraginkortasun energetikoaren hobekuntzari dagokionez, hargatik, 1991n inauguratutako eraikina egungo errealitatera egokituko dugu. Eraikinak isolamendu eskasa du, eta hezetasunak kentzeko eta jasangarritasun energetikoa hobetzeko obrak behar ditu. Halaber, leihoak aldatu behar dira.

Azken batean, orain gure txanda da, 45 urtez lagun askok ahalegin eta lan gogorra tarteko egin duten bideari jarraipena ematea dagokigu. Eta haiek egin zuten modu berean egin nahi dugu, eraikiz, ekarpenak eginez, partekatuz, gure ikastolan sinesten dugulako.