Tafallako Garcés de los Fayos Ikastolak, 2022ko Nafarroa Oinezen antolatzaile izanik, Cascarruejos aintziraren inguruak hartzen duen Oinez Basoa ekimena landu zuen.
Tafallako Ikastolak ingurunean ahalik eta integratuen egongo den behatokia eraikitzea erabaki zuen besteak beste, inguruko landa eraikinen antzekoa, ahal dela birziklatutako materialekin.
Jarduera didaktikoak oinarri, ikasleekin joan ahal izateko behar besteko neurria izan dezan nahi izan dute Tafallan. Halaber, paisaia ederraz eta hegazti faunarekin gozatzeaz gain, ibiltari taldeentzat indarberritzeko aterpea izan dadin.
Aurtengo udaberrian eutsi diote behatokia eraikitzeko auzolanari eta ari da itxura hartzen.
Bien bitartean, ikasleak ere lanean ari dira, behatokiaren ingururako eta estalkia izango denarentzat aldaxkak landatuz.
