Oinez asteburuko informazioa biltzen duen aplikazioa aurkeztu du Nafarroa Oinez 23k

Aplikazioa Nafarroa Oinez Fundazioak eta Koiote industria inteligentzia enpresak sinatu duten hitzarmenaren emaitza izan da. Bertan, bezperako eta eguneko egitaraua, Etxarrira nola iritsi, ibilbidearen mapa eta audio egitaraua ageri dira. Festaz gozatzeko oinarrizko informazioa, erabilgarria eta praktikoa biltzen ditu. Aplikazioa oinez23.koiote.es helbidean bisitatu daiteke eta Oinez egunean bertan, ibilbidean zehar ezarriko diren QRen bitartez ere ikusi ahal izanen da.

Nola iritsi atalean, autoz, karabanaz, autobusez edo desgaitasunen bat izanez gero, non aparkatu adierazten du aplikazioak. Eginiko aukeraren arabera, aplikazioa google mapsekin konektatzen da eta egin beharreko bidea zein den eta zein irteeretatik atera behar den esaten du programak.

Ibilbideko zein puntutan zauden eta nahi duzun tokira nola iritsi ere adierazten du. Egitarauari dagokionez, bezperako eta gune bakoitzeko jarduerak zein diren azaltzen du. Gainera, inklusio eta aniztasunari keinu eginez, audio-egitaraua ere badago, irakurtzeko zailtasunak dituztenentzat. Horretaz gain, aplikazioaren beheko aldean une horretan zein jarduera gertatzen ari den eta hurrengoa zein izanen den ere eskaintzen du.