eus | cas
Árboles apadrinados: 1

Zer da oinez basoa?

Oinez Basoa tokian tokiko proiektua da, Nafarroa Oinez bestaren antolaketaz arduratzen den ikastolari laguntzera heldu dena.

Baina, aldi berean, dimentsio unibertsal eta parte hartzailea du, milaka pertsona eta entitate bere baitan bildu nahi dituena. Horrela, ingurumenaren eta euskararen berreskurapenean lagunduko dugulakoan gaude.

Oinez Basoa Nafarroako Ikastolen Elkarteak (NIE) bultzatutako proiektua da.

Proiektu hau 2008an sortu zen, Nafarroa Oinez bestak, hots, ikastolen bestak, naturan duen ekologia-inpaktuaz jabetu ginelarik. Izan ere, baliabide naturalak kontsumitu, hondakinak sortu eta berotegi-efektuko gasak isurtzen baititu bestak.

Uzten duen aztarna ekologikoa gutxitzeko asmoz, Oinez Basoa sortzea erabaki genuen, besta ospatzen den tokian ingurumenaren kalitatea hobetuko zuen testigantza bat uzteko behin betiko; natura-gune autoktono bat birsortzea, alegia.

Orain arte, lau baso ezberdin sortu ditugu: mendebaldeko baso bat Arbizun, baso mediterraneo bat Tafallan, ibaiertzeko baso bat Tuteran eta baso jangarria, hegazti basoa eta zabortegi eremua berreskuratzeko basoa Zangozan.

Proiektuaren lehendabiziko sei urte hauetan, 18.400 zuhaitz landatzea lortu dugu Nafarroan barna, Nafarroa Oinez bestaren aztarna ekologiko eta solidarioaren erakusgarri. Urtero, sortutako basoak handitzen doaz, eta gure eguneroko lanean baliabide pedagogikoak eskatzen dizkigute. Horren adibide garbia Arbizuko basoan sortutako baltsa, non hegazti migratzaileek eta igelek bizitoki egin duten. Tafallan, NUPren laguntzaz, ikerketa-lan bat abiatu dute, airearen karbonoaren bahiketa eta Oinez Basoak naturan sortzen dituen onurak aztertzeko. Halaber, karbonoaren zikloari buruzko Web Quest bat da abian, ikasgelan baliabide izateko, eta hezkuntza komunitate osoari irekita dago. Egun, esperimentazio fasean dago, eta poliki-poliki datu zientifiko gehiago izanen ditu, Oinez Basoak aitzinerat egin ahala.

Aurten, Baztan ikastolatik proiektu honi segida eman nahi diogu, eta halaber, Oinez Basoa ikur izatea nahi dugu gure seme-alaben hezkuntzan ingurumenaren zainketa aktiboa balio gisa txertatzeko.