Berriak

Nafarroa Oinez 2026ko denda berria inauguratu dute Vianan

Igande honetan, azaroaren 23an, ofizialki inauguratu dute Nafarroa Oinez 2026ko denda Vianan. Espazio berria La Solana kaleko 25. zenbakian dago, eta ostegunetatik igandeetara egongo da zabalik. Bertan, Oinezeko hurrengo edizioko arropa eta material esklusibo ugari eskainiko dira.

Irekieraren harira, Erentzun eta San Fermin Ikastolek jai egitarau oparoa prestatu dute, eta hainbat ekitaldiz bete dute goiza: goizeko hamaiketan izan den gaitero, erraldoi eta dantzariekin kalejira, dendaren irekiera ofiziala bi ikastoletako ordezkarien eskutik, bi ikastetxeetako dantzarien emanaldia, hamaiketakoa eta, amaitzeko, bingo solidarioa.

Inaugurazio ekitaldi ofizialean, Marta Tejadak —Erentzun Ikastolako lehendakariak— denda honen garrantzi sinbolikoa nabarmendu du, bi ikastolen arteko elkarlanaren lehen mugarri gisa. Era berean, 2026ko Nafarroa Oinez edizio “berezia” izango dela azpimarratu du, ilusio partekatutik eta bi ikastolen arteko elkarlanetik eraikia, “Bidean bat gara” lelopean bat eginik.

Bestalde, Uxue Lazkanok —San Fermin Ikastolako zuzendariak— proiektu komun honen balioa eta bi ikastolek Oinez bakarra eskaintzeko duten konpromisoa azpimarratu ditu. Horrez gain, Iruñean ere saltoki bat irekitzeko asmoa dutela aurreratu du, Gabonetan eta Sanferminetan, horretarako beharrezkoak diren kudeaketak amaitzen dituztenean.

Bi bozeramaileek hezkuntza komunitatea eta Nafarroako euskaltzale guztiak animatu dituzte denda bisitatzera eta bi ikastolak elkarrekin eraikitzen ari diren bidearen parte izatera.

Istorioak kontatzen dituen arropa: 2026ko Oinezeko merchandising berria

Arropa eta material esklusiboaren bilduma osatua eta zaindua eskainiko du dendak, bi ikastolek proiektu partekatuaren sinbolo gisa diseinatua. Ez da arropa bakarrik: nortasun adierazpen bat eta “Bidean bat gara” leloaren isla da.

Bildumak honako hauek eskaintzen ditu: era guztietako kamisetak; txanodun eta txano gabeko izerditakoak, kremailerarekin eta gabe; mailak, poltsak eta osagarriak; “Jolasean bat gara” leloa duten haurrentzako jantziak…

Edizio honetarako, halaber, diseinu lan txukuna egin da, eta dagoeneko salgai jarri diren produktu guztietan islatzen da hori. Horrela, diseinuek tamaina desberdinetan aurkezten dute logo korporatiboa: Irulegiko eskutik datorren E letra, sinbolo moderno eta sotil gisa berrinterpretatua, “Bidean bat gara” leloa konposizio grafiko berezietan (ia ilustratuak direnak), kliman eta ingurumenaren zaintzan inspiratutako lore motiboak eta, oro har, gaur egungo koloreak, ehun erresistenteak, eta kirol estiloko jantzi gazteak eta erosoak.

Egunerokorako pentsatutako jantziak dira, sinpleak baina ukitu bereizgarria dutenak, gama kromatikoaren arabera lasaitasuna, energia edo bizitasuna transmititzen dutenak.