Basoak Basora

Nafarroa Oinezek uzten duen aztarna ekologikoa (CO2 isurketak batez ere) gutxitzeko asmoz, Oinez Basoa-Oinez Klima sortzea erabaki genuen, festa ospatzen den tokian ingurumenaren kalitatea hobetuko duen testigantza bat uzteko behin betiko; natura-gune autoktono bat birsortzea, alegia.

Ildo beretik, basoak basora ekimenaren bitartez zuhaitzak landatzen ditugu Oinez basoetan. Oinez egunean basoaren/edalontziaren truke ematen den dirua antolakuntzari utziz gero, landaketa edo eta urteko Oinez Klima ekimenak hartzen dituen proiektuetara bideratzen da. Horretaz gain, etxera bueltatu aurretik edalontzia itzuliz gero ekarpena bikoitza bilakatzen da, ikastolek edalontzia garbitu eta hurrengo Nafarroa Oinez egunean berrerabiltzen baitute edalontzi berriak egitea saihesten delarik.